Ka Philh Cang !!!!!

                                                       

Nikhat a liam i nithaar a hung phan langmang . Minung zong cu nikhat a liammi nih kan ruahnak le kan sining tampi a liam pi chih i ni thar ah ruahnak thar le nungnak thar in hmaile kan nunnak caah kan kal ṭhan ve. A liamcia ni le caan hna cu tuanbia ah an cang hna. Tuanbia cu zeiti hmanh in minung nih kan thlen i kan remh ṭhan kho ti lo. Tuanbia chung ah i cinken ding a um bang philh ding le ruah ti lo ding tampi a um ve.

Nikhat hnu nikhat in kan ruahnak tampi a thleng bang kan sining tampi zong a thleng ko. Duhnak le dawtnak zong a caan nih a kal tak mi tampi a um ve.  Duhnak le dawtnak cu khawika hmun poh ah a sem kho bang khawika hmun poh ah a cat ṭhan kho .Tonnak nih a chuah pimi cu i tthennak a si tawn. A cheukhat cu philh khawh tilo ding tuanbia ah an cang i a cheukhat cu philh ding tuanbia ah an cang .

A luancia caan lio ah nungak pakhat ka duhtuk mi a um . Mah nungak hmanmi facebook timeline hi ka kau zungzal tawn. Tuni ah zeidah a cang hna a hmanthlak tal a van upload hna maw tiah ka bih zung zal . Aa theibal mi kan si lo caah a mah cu ka chat ngam tak rih lo. A mahsin chimngam lo in ka hawile sinah ka duhnak kong le a dawhnak kong ka chim tawn. Ka hawile nih  “kan sin ah chim langmang ti hlah, a ngeih zong kan huam tilo . A mah sin ah chim ca . Pa na si lo maw?” tiah capo in an ka ti tawn.

Nikhat cu ka hawipa pakhat ka inn ah a ka leng . Innchung ah a um i kei rawl ei ah coka lei ah ka kal . Ka phone cu cabuai cung ah ka chiah ta. Ka hawipa nih ka theih loin ka phone cu a rak lak i ka duhtuk mi ngaknu cu a rak chat. “ Inn ah na tin cang maw ?” tiah a rak ṭial manh . Inn chungah cun ka hunglut i ka phone cu a umnak teah a rak chiah manh cang . Rawl kaa hnihkhat ka bar ahkhin ka phone messenger cu “Ting!” tiah a van on i ka van zoh cu ka duhtuk mi ngaknu nih a rak ka chatmi a si ko. Zei si zong zohta lo in ka nuamh tuknak ah vawi hnihkhat cu ka hlawk ta hmanh . Ka hawipa sinah cun “ Khah zoh hih a manh nih a van ka chat cang hih!” tiah thangnawn in ka van chimh. Ka hawipa cu a nichuak tuk i a ni thluahmah . A nihnak ah biazong a ka let kho cawlh lo. Tlawmpal a rauh hnu kha “ Ka dua a cutluk va nuamh cu , ṭha tein zoh keimah nih kan chat piak hmasa khah” a van ka ti. Ningzah phen ah “ Ka phone hi ka theih lo kaar ah tong ti hlah” tiah ka van hro. Nihin nitiang ka hawipa nih mah cu kong cun  a ka sawinak thai.

Nile thla a liam langmang i kha hlan a mah nih chat hmasa ding ka hngak tawnmi ka lungput zong a thleng ve. Nikhat cu kei mah nih ka chat . Chun i pumhnak ah hman ka thlakmi a hmanthlak tete zong ka hei kuat chih i a lawm tuk hringhran. Mahnak cu ka chawnngam i kha hlannak cun kan i neihniam deoh cang. Mah nungak kong cu khawika hmuh ka phanh zong ah  ruat lo in kan um kho lo . A duhning in nun ding zong ka zuam i a duhning si ding zong ka zuam. Minung hi kan sining lo in nun le chimrel hi a haarbik a si ko . Zing chuak a mah chat lo le chawnh lo in ka um kho lo . Zaan zong cu ka si ṭhiam. A mah ka chawnh caan le kan chat caan hi ka nunnak a lawm bik caan a si . Vawilei nun man ka ngei ko hi teh tiah ka thinlung nih a ka chimh zungzal.

A mah hi mi nunnem le mi chawnhbiak zia  thiam a si. A dawh zong a dawh pinah a fim zong a fim. Ka chawnh caan le ka chat caan i aa manh lo zong ah aa manh tik i ka ca a hmuh khap in a ka leh tawn. A nih hi hawi dang he a lawh lonak cu aa manh lo ngai mi a si. Chunni tlak a cawlcanghnak ah a ba zong a ba fawn. Zaan tlaihnu deoh hna ka chawnh tawn caan , ka bia a fonghlei deoh zawn cun a sum kho ve lo i  “ka it caan dawh kan cheuh hih” tiah capo biatak in a ka ti tawn.

Kan umnak khua a hlat caah kan i tong kho lo. Cucaah a caan ka ngeih lio teah ka duhnak kong a sin ahchim ning ka ti . Online chungtal ka chim lo ahcun a caan ka ngei ti la lo tiah online chung in ka chimh . Nain ka chimmi bia hi a nih caah a kha tuk mi bia si dawh a si .. Ka chimmi bia a cohlang lo i cun duhnak kong kan sin ah a chim bal lo. Ka chim chir biadang ah a ka kal pi caan zong a um . Cun faknawn in a ka leh caan zong a tampi.

Ka duhnak hmanh a cohlang lomi sinah bantuk bia chim langmang cu tiah keimah le keimah ka al tawn. Ka chim ti lai lo tiah vawi tampi bia thluknak zong ka ngei. Cun a sinah ka chimmi bia hna kha ka ruahpiak duhhlah tiah a mahsin zong ah voitam pi ca in ka kuat tawn. Nain mah hna cu thli nih a chawihmi favai( phuai) bantuk an si. Thlinih a chawih langmang i a sin ah ka duhnak ka langter ṭhan langmang.

Caan cu a liam langmang bang kan i chawnh lonak le kan i chat lonak zong a sau pah cang . Cun a mah hi ka thinlung chungin philh khawh ka zuam . A nih zong a nunnak caah tiin thihnak ral a do i kei zong ka nunnak caah thihnak rak ka do . A mah philhnak ding ka rak i zuam langmang nain ka tei khawh tawn lo mi kha nihin ni ahcun ka tei cang. A mah cu ka thinlung chung in ka philh cang . A nih nih cun a ka philhnak a hlan cang lai ti zumhnak ka ngei .

Nihin cun kan ruahnak ah a min zong a bau cang .  Ka thinlung chungah hmunhma a ngei ti lo. A donghnak bik a caah ka ti khawh mi cu “ Hmailei na nunnak ah Pathian nih in hup pheng seh law i zoh khenh seh. Vawilei i a nung mi minung hawi kan caah zoh chunthlak nusal ah i sersiam ko seh. Na duhnak in tlinter seh law na derthawm caan ah hazang thaar in pe ko seh.” Tiah thlacam piak lawng a si cang . Kei santlai lo valpa hi nan thinlung ah hmunhma na rak ka pek khawh lo mi hi nan caah Pathian thluachuah a si ko. Kan tuanbia hna cu nihin ni thawk in ka philh cang!!!!!!! Mangṭha

v Nai hrawng ca ka ṭial lonak a sau pah i lungchuak umhaar phan rel ding ka ṭial mi si . Caan pek tein ka ca a ka rel piak tu nan dih lak cung ah lunglomhnak chim cawk lo ka ngei ko . Pathian nih thlawchuah in pe ko hna seh.

Share on Google Plus

About biathli

This is a short description in the author block about the author. You edit it by entering text in the "Biographical Info" field in the user admin panel.