Kan hnu deoh te ah Myanmar ram mi pahnih kan company
in an kan chuah tak i pahnih lawng kan tang. Nai hrawng cu kan company rian a
tamtuk i zeiti hmanh in minung kan i phanzo kho ti lo. Chunzaan in kan tuan
zong ah kan rian kan tei kho ti lo. Cutik ah mithar uahṭhan ding in khua an
khan.
Kan bosspa hi a duh ce ngaimi a si tikah mithar auh
zong a harh ngai. Tulalak interview an hung phi ko nain an duhmi aa hmuh kho
lo. Nihin cun kawlram mi interview an rak tuahmi hi minung 15 hrawng an si
cang. A duhmi minung nih rian a haar caah an tuan duh hoi lo . A duhlo mi
minung hna nih cun tuan an duh ko nain an au fawn hna lo.
Korea holh a thiam lo deoh mi hna interview an rak
phit ahcun holhlettu le rian kong chimtu ah ka hawipa silole kei mah hi
zungkhan ah an kan auh tawn. Cutincun ka
hawipa he kan i chang langmang . Kha hlan ahcun interview a rak phi tawnmi hna bia hna nih khurkhua a ka ruahter tuk lo.
Kan ṭuan la a ti pawl hi thlahlawh zoh in
biakhiahnak an rak tuah deoh i caan zeitluk in dah kan pek lai timi cu an rak
tuahtan lem lo. Kan ṭuan laloh a titu pawl nih cun a caan an pekding kha an zoh
pah i si lai dah. Nain an bia leh ningtu cu a koktlong deoh ve. Nan rian a
haartuk i ka tuan kho la loh a timi an um bang ka huamci rian a si loh a timi
zong an um ve.
Tuni a rami pa tecu a bia leh ning a phundang ngai.
A bialeh mitete nih khurkhua tampi a ka ruah ter. Chuncaw kan ei lio ah a ra i
ka bosspa umnak zungkhan ah ka lanhter. Chuncaw eichung vialte bia cu an rak i
ruah. A biachimmi nih ka bosspa lung a ton deoh i si lai dah caan saupi bia an i
ruah khawh. Rian awt caan a hung cu i rian ṭuannak leiahcun ka kal. Ka rian ka
thawk manh lo ka cazi a simi nungak te nih a rak ka auh. Bosspa nih ra rih seh
an ti tiah a rak ka chimh.
Ka vakal i an mah pahnih telawng cu bia an rak i
ruah ko. Ka va phan i ka boss pa nihcun ka biachim mi a theih kho tuk lo i rak
leh piak tuah cun rian kong zong ṭhate rak chim a ka ti. A mui ka zoh i keimah
bantuk muidawh nawn te a si heee . A ngo zong a ngongai . Cun mithman a benh i
a mui ka zoh bak hin an fim pah mi a si lai ti ah ka ruah cawlh.
Bia cu kan va i chawn. Mi chawnhbiak zia a thiam i a
mah he biaruah cu a nuam ngaingai. Rian kong hna cu ka van chimh . Cun kan ṭhutdir
ning le kan ṭuancaan ka van chimh . Kei cu Khrihfa ka si i zarhpi ni ka tuan
kho la lo. Biakinn ah kal ka duh an van ka ti cawlh. Aw.. kei zong khrihfa ka
si ve ko nain rian tlawm deoh caan le herhpoi ka ngaih ahcun ka chimh ta hna i
mah cun ka kal tawn. Rian tam deoh caan ahcun ka tuan ve ko tiah ka ti.
Immm … kei cu zarhpi ni chir hi holh ka cawng . Tu
langbang hi cu ka exam aa naih tuk cang i ka ṭuan kho men la lo. Korea ka rat
hi tangka kawl lawng ah ka ra lo fimnak zong kawl chimh dingin a ra mi ka si.
Mino te lawng ka si rih i phaisa cu ka thihhlan lo ka kawl ko la . Fimnak tucu
a caan lio ka kawl lo ahcun ka tlai lai. Cucaah ka tuan kho lai lo. Nang mah
nih ka chimh piak a ka ti i ka bosspa cu ka chimh piak .
Ka bosspa zong nih “ aw a tha ko . sicun mah vial
hin interview cu za rih seh. Nan tawin a ci’ tiah an kan ti i mahcun rianṭuannak
lei ahcun kei zong ka kal ve. A ka lehmi bia nih khurkhua tampi a ka ruah ter .
Kei hi tah fimnak maw ka thim dah phaisa dah ka thim tiah keimah le keimah bia
ka hal. Kha hlan rian ka ṭuannak ṭhing ahcun Zarhpi ni hi kan ṭuan tuk lo i
zarhpi ni chir korea holh ka cawng kho. Cun biaknak lei zong ah kan pumpe kho
deoh. Tutan ka ṭuannak company cu ka rian ṭuan caan a sau ngaingai i rian tipin
ahcun thildang zeihmanh ka tuah khawh mi a um ti lo. Korea holh ka rak cawnmi
zong ka pehzulh kho ti lo. Biakinn lei zong ah ka chuak lang kho tuk lo .
Vawilei nunak ahcun cu phaisa locun nunkhawh hi a
rak si lo . Minih phaisa nakin a biapi deohmi a tamtuk an ti konain phaisa um
lo taktak cun zeithil hmanh tuah khawh a si lo. Phaisa cu kawl ding a si ko.
Nain mino hna nih cun kan no lio caan ah phaisa lawng kan kawl ahcun hmailei kan nunnak ah mikut tang ah phaisa pek
in rianṭuan mi kan si peng ko lai. Cucaah Phaisa zong kawl a herh bantukin kan
nolio caan ahcun fimnak zong kawl chih a herh ko. Fimnak cu micung cawitu a si
. Fimnak na ngaih ahcun midang hna cu nan kuttang ah rianṭuan mi an si ko lai .
0 comments:
Post a Comment