Minung kan si ahcun a ho hmanh a tlamtling mi kan um
lo . Nu paw chungin thlakua chung kan um hnu ah vawilei ah mithmai kan van
langh cio hna. Vawilei ah mithmai kan
lang bak in mizei hmanh a tlamtling mi kan um lo . Thiamnak ah siseh fimnak ah
siseh zeihmah thei lo le thiam lo in kan hung chuak cio hna. Takro in a chuak
dih mi kan si viar.
Mah balte kan ṭhanning tucu kan pawngkam si ning
deoh in kan ṭhang cio hna tikah kan hmuhning le kan ruahning zong tampi a kan danter. Fimthiamnak sangdeoh a cawng
kho mi nih fimthiamnak tamdeoh an ngei la i a cawng kho ve lo hna nih cun
fimthiamnak tlawmdeoh an ngeih la.
Zeitluk
zongin fimthiamnak va ngei ko seh law minung a si bang palhnak cu a ngei ve ko . Minung le palhnak cu a ṭhen ko lo. Minung cu cafung pakhat bantuk kan si .
Cafung cu palhnak a ngeih lai ding theih a si caah palhmi hlohnak ding in
khehphiat ser chih cawlh a si . A palhnak cu a hloh ṭhan i a dikmi in a remh ṭhan.
Sinain kan nih cu thil pakhat kan tuah bal lo mi
tuah kan i timh tikah lung awṭawm in kan um tawm. Mah ti hin tuahning law ka
palh hnga maw ?. Mah ti hin tuah ning law a ṭha hnga maw tiah kan i ruah tawn .
Palh lai kan tihnak nih tuah lo in a kan umter tawn. Palhnak tih nih ral
chiahnak a chuahpi . Tikah a dik ko , a tha ko kan timi zong ral ṭha tein kan tuah ngam ti lo.
Mah cu ruahnak cu nihin ah kan kal tak i kan caah
zeithil hmanh a si kho lo , tuah khawh lo mi a um lo ti lungput kan ngeih cang a hau. Kei mah
Golden star boarder ka um lio hi Golden Star boarder an dirh kum bak a si i kum
dongh lai ah Boarder ummi poh roca fimding ah tiin kan hmanthlak le mah
ruahning motto tlangkhat cio a rak kan hal .
Kan hawile pawl cu U Bung (Che) cauk tang i ummi
catlang tete khi a rak ṭial hna. U Bung (Che) cauk tang um mi motto tete an ṭha
ngai . Kei zong cazoh ka zuam deoh lo caan poh ah ka rel tawn i thazang thar ka
la tawn. Sinain kei cu U Bung ( Che) chungta la lo i keimah ka ruahning (
Feeling) ka rak ṭial . Mah cu zeisi
tiahcun “ Ka caah a si kho lomi thil a um lo , a si rih lo mi lawng a um” tiah
a tawi fiannak in ka ṭial . Kan Boarder uk nih a zoh i a nih chuak pah.
Nih pah bu
khin ,
“ Pa Kep, Na caah a si kho lo mi thil a um loh tih”
tiah capo biatak in a rak ka hal .
“ Aw! Saya a dik ko , Ka duh mi chung ah a si kho lo mi
thil a um lai lo” tiah k arak leh.
Hal awk a ka theih ti lo maw si hnga zeidek a bia a
peh ti lo . Chim duhmi cu minung cu zeithil kan tuah lai poh ah ka lungput hi
a bia tuk. Kan lung nih mah hi cu ka tuah khawh la kan ti cang mi cu kan
tuah khawh hlan lo tuah khawh kan i zuam. Ka tuah kho la loh kan ti ahcun kan
tuah thlai lo.
Hawile hna thil pakhat tuah kan i timh tik ah kan
tuah hlan i ka tuah kho bal la loh kan ti ahcun zeitik hmanh ah mah cu thil cu
kan tuah kho bal lo le. Palh lai kan phan peng ahcun kan tuah kho bal la lo.
Plahnak le minung cu a ṭhen kho lo mi a si ka ti cang bang palh lai phang hlah
. Na palh zong ah remh ṭhan khawh si . Pakhat balte minung kan nunnak ah kan
palh sual mi zeitik hmanh remh ṭhan khawh ti lo mi thil cu an um ve. Mah cu bal
te thleidan thiam kan i zuam hau.
Kan tuah bal lo mi zong tuah chin ko uh sih . Kan
thiam bak rih lo mi zong tuah i awt ko hna uh sih . Mah cu thil kan tuah ding i
a herhmi fimnak le thiamnak cu kan tuah nak lam kan kal pah in lampi ah kan i char
ko hna lai . Ka tuah kho la loh kan ti i tuah hram kan i thawk lo ahcun zeitik hmanh ah kan tuah ko thai la lo .
0 comments:
Post a Comment