Tuzing cu tuandeoh in rian kal ka thawh i tuan deoh
ah ka company ka phan .Zing suimilam 8:00am lawng a si rih caah rian tuan kan awt deoh rih lo . Cucaah
dinhnak room lei ah ka kal i coffe ka ding .
Coffe ka din cuahmah lio ah ka
company chung in Sakhia sipalma ti hrawng
minung pa hnih a i hro leng aw nih ka company chung cu a tlerh dih. Korea holh ah holhchia cu a tling ko hlah maw ti awk in a i pam .
Zingkhua in mizei hme mah tluk cun an aw san hnga
tiah aw ka theihnak lei ah cun ka va kal. Zunput kam ah Korea pa le Kawlpa an
rak i hro len cu ka hei hmuh hna. Kawlpa hi kum 35 hrawng a si i korea pa tucu
kum 28 hrawng a si lai dah. Kawlpa cu a thin a rak hanhtuk si lai dah thirpum dongkhat
tluk hrawng a put i tuk a rak timh cuah mah lio khi a si.
Elaw! Kan lo ko cang la hi teh tiah kawlpa thirpum
cu ka van chuh . Ka chuh i a dangah ka chiah dih bak ah kan Company uktu a rak
phan ve. Company uk hi Korea mi a si i a ka dir kamh lai ti ruahnak in si lai
dah Korea pa nih cun Company uk cu a van chimh cawlh . “Thirtum in tuk a ka
timh” tibak cun a bia a van awt cawlh .
Kan company uk cu a fim ve caah a ruang a van hal
hmasa. “zei ruang ahdah tuk an thimh” tiah kawlpa cu bia an van hal cawlh. Kawipa nih cun “ A duh poh
in rian a ka fial , a mah nak hngakchia ah maw a ka ruah” tiah korea holh peile
peilo in a van ti ve. " Zei rian ko dah an fial ?" a van ti . "zunput tawl teh a ka fial ko, mah pa hi a hngal tuk " tiah a vun leh.
Korea pa hi kan company i a hung luhnak a sau rih
lo. Thla thum hrawng lawng a si rih. Zunput cu a mah telawng nih zingchir a
tawl tak reng. Riantuan zong a fal caah kan upat ngai mi asi . Company uk zong
nih hawihlei in a dawt deoh i a chawnhbiak deoh ko. Kawlpa tucu caanhman tein
rian a tuan mi si. A holh zong a holh tuk theng bal lo. Kan mah nih kan va
chawnh hmanh ahkhin kan bia lawng a kan
leh tawn. Mi daidumpi khi a si .Sinain kan company rian a tuannak hi cu kum
thum hrawng a si ve cang .
Kan company uk nih cun korea patu fakngai in a sik. “
Nang mah hi a fel kan in ti hawi hlei in kan in dawt , kan in chawnh biak . Kan
in upat nain kan zoh zir i na tuah mi na hngalsak . Mi na duh poh in rian na
fial ve hna. Na tuanmi hna zong hi tuah kan in ti mi pakhat hmanh an si lo.Na
duh le tuah na duh lo le tuah lo ko. Mah hi kan timi na duh lo ahcun a tu a rannak
in kan company hin chuak.” tiah fak ngai in a si .
Kan nih teh hawihlei in kan tuahmi ah a hngalsak mi
kan si sual maw? Khrihfabu rian ah siseh khua le veng caah siseh ram le miphun
caah siseh hawihlei in kan tuah mi ah kan i hngalsak sual maw? Hawilei in kan thazang kan chuah mi le kan tuan mi kha minih a kan hmuh i an kan upat ko. Bia in kan sinah upatnak a chimmi zong an um bangin thinlung chung in a kan upatmi zong an
um ko lai.
Minung cu kan ruahnak le kan sining a dang lengluang
ko. Kan ruahnak i khat dih hna sihlaw tuah ding hmanh kan ngei la lo .Kan mah
tuahzong a hau lai lo. Cucaah mi caah ṭhatnak tuah a duhmi kan um bang mahzawn
lawng a ruatmi zong kan um ve lai. Mah cu kan
khualtlawnnak vawlei sining a si ko.
Kan tuahkhawh mi kan tuahkhi kan mah rian a si ko. Kan
tuahmi cungah hngalsak in kan um ahcun khahlan kan tuahmi vialte cung i a kan
upattu hna nih upat tlak in a kan hmu ti lai lo. Kha hlan a kan chawnh biak
ning zong in a kan chawnh biak huam ti lai. Cucaah micaah kan tuahmi cung ah i
hngaksak hlah usih . Kan tuah khawhmi teh a si cu tiah lungtho tein ṭuan i zuam
hna usih.
0 comments:
Post a Comment