Kei mah ve lo bang naihrawng cu nan sin ah ca ṭial
in ka rak in leng langmang tawn hna. Ka ca ṭialmi hna hi thazang peknak deoh le fimchimhnak deoh an
si caah zapi nih a rel kan i harh pah lai. Cun ka ca chung ah cun a tlingtuk mi
le a thiamtuk mi hna ka hung lo. Sinain ca ṭialtu kei mah lila zong a tlingmi
le a thiam mi ka si lo. Mino te ka si pin ah nan mah bantuk in a zuam cuahmah lio mi lawng ka
si ve. Kan tlamtling lonak a tampi nain nan sin ah thazang pek in ca ka hung ṭial
tawnmi hi thazang a derthawm mi hna kan caah thazang thar kan i lak khawh sual ah tiin ka ṭial hnawh chan si. Tutan zong ka rel
mi tete hna le ka ruahnak tete kan van in hrawmh rih hna lai . Lungsau thinfual
in nan rel caah ca reltu nan dih lak cungah ka lawm ko.
Mupi hi mifim thiam hna nih an chim ning ahcun a
chan chankhat hi kum 70 hrawng lawng a si . A chan chungah a nun khawhnak ding
tiin ingtuarnak fak ngaingai nih a den ve tawn. Kan nih minung hna zong kan
nunnak caah ti in thadi zangbar in rian hehchat tiin rian kan tuan ve. Kan
kawl kan hawl ve. Mupi hi a chan zahceo ah hin a nunnak caah fak piin inn
tuarnak a ngei . Kum 40 hrawng a si ah a tin le a hmur hna an sau tuk cang i thilnung hna fekṭhup in a
tlai kho ti lo. A thla i a ummi a hmul hna zong an chah tuk cang caah a duhning
in a zuang kho ti lo. Thlitu nih a a chawih langmang caah a duhnak zong ah a
phan kho ti lo.
Cutik ah ei awk rawl zong a kawl kho ti lo . Cu lio
caan ahcun duh thim ding pahnih a ngei .
1. Rawl
ṭam in thih le
2. A
tin, a hmur le a hmul hna ṭhlongh i thla
nga chung rawl ulh in a um a hau.
Rawl ṭam in thihnak cun a tin siseh a hmur siseh a
hmul hna siseh ṭhlongh i thla nga chung raw lei lo in um aa thim . Cutikah zei
dah a tuah tiah cun a sangbiknak hmun le a him biknak hmun a kawl i bu aa sak .
Mah cun lungpang ah a tin le a hmur hna cu lung ah a tat hna i khiah khawh aa
zuam . Cun a khiah dih hna hnu ah a bu ahcun a kir ṭhan. A tin le a hmur hna a corh hlan tiang mah a
bu chung ahcun rawl lo in a um . A hmur an hung corh ṭhan tik in a hmur in a
hmul hna cu a ṭhlongh ṭhan hna . Mah tincun a um hnu ah a tin , a hmur le a
hmul hna a ṭhat dih hnu ah leng ah a chuak ṭhan i rawl a kawl kho ṭhan . Mah
hnu cun kum 30 hrawng cu a nung kho ṭhan.
Kan nih zong kan nunnak ah lam pahnih peng thim ding
kan ngei . Mah pahnih ahcun pakhat poh kan thlah i kan kal tak a hau. Kan
siang lo tukmi zong a si ko lai nain thlah a herh ahcun kan thlah a hau ko.
Zeicatiah mah hna nih cun kan nunnak le kan i zuamnak ah dawnkhan tu an si lai.
Kan thlah lo ahcun a kan nehtuk lai i hmailei ah kan kal kho ti lai lo . Cu
caah thlah ding hna cu kan thlah a hau ko .
Mupi hi thlichia a hrang lai poh ah thlichia nih a phanh khawh lonak le thlichia
thazang a der thawmnak hmun cungsang pi ah a zuang tawn. Zeithluk hmah in thlichia hrang
hmanh seh law a nih cu timcia tein a um caah a nunnak a him.
Kan nih zong kan nunnak ah thlichia nih a kan den
hrim lai. Haarnak le thinphan thlalaunak thiachia hna cu a hung hrang lai. Nain
timhcia tein kan um ahcun mah cu thlichia hna nih a kan thlu kho lai lo. Kan
dirnak in thluk an kan zuam lai . Kan kalnak lampi ah haarnak nih an kan bawh lai. Lam kam i a bo
langmang mi uico bantuk khin a kan boh lai .
Mah uico hna kha lung in kan cheh hna ahcun an bo a zual chin chin lai. Kan
caan tampi hna cu mah uico lungchehnak ah kan hman lai i kan phanhnak ding hmun
kha kan i ruah ning in kan phan kho lai lo. Cucaah lam kam i a bo langmangmi
uico hna cu va bo ve ko hna seh . Mah uico
hna cu kan lonh tik hna ahcun an mah tein an bo mi cu an ngol te lai .
Fighting !!!!!!
Ca sautuk mi cu a rel a haar ngai caah a tawi khawh
chung in ka van tial . ka ca belte a pehtawnh kho tuk lo. Carel tu kan dih lak in a rel thiamtu i zuam hna u sih .kei zong ca sautuk
mi rel cu ka huam tuk ve lo. Ca reltu nan dih lak in nan i timhmi nan chunmang
cio ah hlawhtling mi si cio u law…
0 comments:
Post a Comment