Zeitik ah dah exam kan dih lai i zeitik ahdah
sianginn khar si lai ti lawng ka ruat peng. Ka ruat khawh mi cu sianginn khaar
cun zaan chir cazoh zong a um ti lai lo. Zaan len duh le TV zoh duh ah zoh khawh a
si cang lai. Ka mawh lo Sianginn ka kai lio sianghnakchia ka si lio ahcun a
leng minung nun ning ka rak thei lo cu ta. A leng minung kan nunning cu TV
chung i ka hmuh bantuk in a si lai ti ruahnak ka rak ngei.
Sianginn ka kai lio ah hin Math cu ka thiam ngai ve
. Sinain Math No.2 hi cu ka zoh huam bak lo . Sianginn ka kai chungah zoh ding
ah ka rak ruat lo mi pakhat cu a rak si ve. Exam lai ahcun a baihat in kan rak
zoh tawn. Zeiruangah mah Math no.2 hi kan cawn zong ka thei lo .
Tanghra ka van dih cun ka thaw a hung chuak tak tak
ko. Ka nu le ka pa nih sianginn peh ṭhan an kan ti nain sianginn kai nih a ka
simh tuk cang caah ka zuam ti lo. Myanmar ram sianginn in boih ka va lak zawng
ah rian tuan awk kan ngei hlei la lo. Cucaah ka peh ti lai lo tiah ka ral al
hna. Ka pa nih “ Kan in chimhmi na duh fawn lo le tucu na puitling ve
cang caah nang mah nih hmailei nan nunnak lam cu a thim na thiam ko lai” a rak ka ti.
Tanghra dih hrang ahcun kan ram ah rian a um lo
tikah ramdang kal ka thawh ve. Hawi dang zong an kal cio i mizei hmanh nih ramdang um a haar ning kong an chim ka
theih bal lo caah lungtho ngia in ka thawh . Ram dang cu ka hungphan i sianginn
chung nunning he cun a kalh taktak. Sianginn dingrep a tam i sianginn cu a haar
tuk . Zulhding a tamtuk ka rak titawn mi kha mikut tang rian ka van tuan tik
ahcun sianginn dingrep cu chim awk a rak tlak lo.
Mikut tangah cun zulh ding a tam . Siang cachimtu
bia zong duhtawk in kan rak al hna . Ka saya/ma te nih a nemnak tein a rak kan
leh tawn bang cun a ral kah tuk hringhran. Mikut tang rian kan tuan ahcun an
bia le an dingrep hi ṭhim fang tiat zong al le lonh awk a tha ti lo . Ka
hngakchiat lio zuktuh ka lenh tawnmi ka duhning poh in ka tuah tawn bang tuahto ka hung si ve cang.
Kan hngat lio ka lenh tawnmi zuktuh kha keimah
singin law ka boss pa cu ka hngakchiat lio kha a si hna. Ka riantuannak ah le
sianginn ṭhiṭha in a dih lo mi ka caah cun zeizong vialte a fawimi pakhat hmanh
a um lo.
Sin, cos….. heiti bantuk α,β,µ.. heiti bantuk zong ṭha
in ka zoh lomi kha nihin ahcun a theipaar ka zun cang. Ka rianhi thir kuavih ,
bol herhnak le thir a ruang lomi ruanter
heiti bantuk khi a si caah a fawi lo. 35 degree in a zau mi hna kha ei deoh a
hau caah sin,cos pawl cun calculator in tuak in ei deoh a hau. Cun centimeter (cm) pakhat chim lo 0.001 cm zong palh awk a ttha lo.
Ka huamsam
deoh ah le khat lei ka riantuanpi hawile tuan ding an rak ngei ve lo. Vietnam
ka hawipa te cu a thiam ngai. Sianginn a kai lio ah cazoh fal dawh a si. Cun an
ram sainginn cawnning le kan ram sianginn kan cawnning zong a dang deoh zong a
si kho mi si. Ka thiam lonak deoh poh ka van hal ah le holh ah kan buai . Korea
holh a thiam tuk ve lo . Kei nih le zeihlei lo . Cun a holh a cet pah hoi i kan
pahnih kan i chimh ahcun chun nitlak pakhat hna ka tuah khawh tawn. Cutikah a
mah halnak cun tiah inn cung zungkhan chung ah ka va kal i holh thiamtuk lobu in kut le ke i veih in ka va hal tawn hna.
Ka riantuan mi nakin inn cung le inn tang ka
chawhlehnak ah ka ba deoh tawn. Sianginn ah ṭhaṭhi in ca rak zoh ve lo cu zei te
thiammi ka ngeih lo tikah ka thluak hi a fak khun. A hnawk deoh mi kan tuan
langbang ahcun ka lung zong a mit dih tawn.
Nihin cu khurkhua fak piin ka ruat. Ziah sianginn ka
kai lio ah ca ṭha tein ka rak zoh hna lo. Zeiruang ah dah mah hi a herh la loh
tiah ka rak zoh zuam lo. Ka lu kaa kheoh . Ka chir ruangmang cang. Sianginn i kan rak cawnmi kha exam awngah lawngah ka rak ruahmi ka palh tuk cang ko hi ta. Nihin ah a zeizong te in a rak herh dih
ko hi ta tiin ka chir ruangmang cang. Chirnak cu a caan luan hnu lawngah ngah a
si anti mi hi keimah teh ka rak si ko hi.
Pathian sinah thla ka cam i Pathian nih a ka leh mi
cu “ ka fa, na no tuk rih. A caan na ngei ko rih. Fimnak cawn cu a tlai ti a um
lo ” Ti ah a ka leh. Umm Korea ka tlung tik cu sianginn ka peh ṭhan la tiah kei
mah tein ka hnem . Ka peh ṭhan tik cu kan cawnmi vialte pakhat hmanh ngan lo in
ka zoh cang lai tiah biachahnak ka ngei.
Kan nau le sianginn khan chung le a leng nunnak cu a
dang tuk dah kaw. Ram dang ah an kal cio i ka kal ve lai ti cu ruat hram hlah
uh sih. Sianginn chung i kan i lomh khawh lo cun zeitin hme mikut tangah cun
rian kan tuan khawh lai. Fimnak cawn ah na tha chia hrim hlah . Fimnak na ngeih
ahcun khawika hmun na phanh poh ah micung ah na um peng ko lai. Mi cung cawitu
cu fimnak a si .
0 comments:
Post a Comment