Kum nih tlai awk thalo in a liam langmang. Ka hung upa deohdeoh i kumcaan hnanih a liam rang tuk in ka thei. Nikum thalcaan kha naite pei si ti awk in a liam rang cang. Ka dawtmi chungkhar hna mi sining an phansual la lo tiin miram dang ah tuanzai ka rel. Ka nau le hna mihngaar in umding cu ka ruat kho lo. Cu caah ramdang kal ka thawh . Ka phanhkaa hrawngcun theihbal lo mihe um cu ka rak calh ruam lo. Khuaza ka ruat, pawngkam ka zoh tikah kei mah lawng ka si lo ti ka lung a hung pem. Midang hna nih an tuah khawhmi cu ka tuahkhawh lai tiin kamseh bu he ka hne chih. Tu ahcun ka chungkhar le hmailei ka nunnak ka ruah tikah khahlan ka ruahtawn mi ruahnak caan hmanh ka ngei ti lo.
 |
| Add caption |
Ramdang ka kalnak a ruangbik cu Money tiin khawhmi phaisa (tangka) ruangah a si ko. Minung hi phaisa sal kan si dih ko hna. Hi phaisa um lo cun ka chung le zeitin dah ka zoh khenh khawh hna lai. Hi phaisa umlo cun zeitin dah ka nau le fimnak cawng dingah sianginn ka kai ter khawh hna lai. Hi phaisa um locun zeitin dah hmailei ka nung lai. Hi phaisa hi minung nih kan herh dihmi a si ko. Kan ramah hitluk hin phaisa hmuhnak ding lam ka sining he cun ka hmu kho la lo. Ramdang ka hung phanh taktik ahcun phaisa lawng hlah fimnak, hmuhthiehmi le hmuhton mi tampi ka rak ngah chih . Ramdang ka kal hi phaisa lawng ka hmu lo hi ta ti ka lung a hung pem.
Miram dangcu ka hungphan. Kan ram i ka hmuhbel lo mi hna ka hung hmuh hna. An nunning, an khuasat ning ka zoh tikah kan ram i ka rak nunning cu ka mithlam ah ruah lo piin a hung lang. Ka nih hna a chuak, ka ning hna a zak phun khin ka um. Kan ramah cun zing a chuak , rawl ei ah thawhchawm hau in ka um. Ka hung tho i rawl suah cia le meh thaw thaw he capuai cungah ka nu nih a rak ka chiah piakdih cang. Ka einak kheng hmanh tawl lo in vah ah ka thawh. Chun nitlak inn hlam lo in lamcung ka nuam. Hawile sin ah ka kal. Zaanriah eicaan cut hrawng khin ka tin i zaan riah eikhim in vah ah ka thawh. Lamkaam Kunya dawr ah thu in biasawng kan thawrh tawn. It caan cut in inn ah ka tin. Cutin cun khua ka rak sa. Hmailei ka nunnak ding le ka chungkhar caah ruat khawh mi ka rak ngei lo .
Ni le caan nih tlaih awktha lo bang ka kumzong dirter khawh a rak si lo. Kumkhat hnu kumkhat ka hungpa deoh. Kha hlan ka rak ruat bello mi thil hna ruah awk kan hung theih. Lungre theih caan zong a tam.Kan ramah mahbang hin phaisa kawlkhawh a si hna lo ti ka ruah ah ka ngieh hna a chia, ka thinhna a hang lei. Tucu miramdang ah zaan a rong phuntling i a ceu mi mei hna nih an i dawh tuk nain dawtmi hna um lonak hmun cu ka thinlung muihnak nih a chilh ko. Umhaar le lileng in miramdang ah khua ka sa.
Tlangvaal puitling ka hung si cang. Kha hlancu duhnak sullam thei lo in rak zuangzam hmanh ning nihin cun duhnak tak sullam ka hung i fiang cang. Duhnak mui hi a rak i dawh tuk hi ta tiin ka thinlung mit nih a hung hmuhkhawh cang. Cuhlan cun timhmi ngeilo in rak vakvai hmanh ning duhnak nih lamdik ah a ka hruai cang. Sinain duhtling lonak vawilei an ti bang duhmi cu a raktling kho taktak bal lo. A chelcaan ahcun nun hi ka huamtawn lo, ka tlu langmang tawn sinain second pakhat hmanh rau lo ah aw pakhat nih ka tluknak in a ka thawh than langmang. Cu aw cu " Ka dawtmi ka fa hning na sin ah ka umpeng ko, zeihmanh ttih hrim hlah" tiin ka biak Pathian aw nih a ka thawhthan langmang. " Aw! Pathian a tha, a tha hringhran ko" tiin lomhnak in ka khat than zungzal.
0 comments:
Post a Comment