Minung kan nunnak ah hin lawmhnak in kan khat caan a
um bang ngeihchiat in kan um caan zong a um . Zeihmanh kan ṭihlo caan a um bang
ṭihphannak in kan um caan zong a tam pi. Hmailei kan kalnak ding lam ah
khurkhua ruat in ruahchannak he saduh
kan that caan zong a um bantukin ruahchannak kan ngeih ti lo i hnabei dongh vansan
au in kan um caan zong a um ve ṭhiam ko.
Kei zong naihrawng cu kan sining a phun dang ngai.
Hmailei caan ka kalnak ding lam ka ruat khawh lo si lo in tulio kan nunnak ah
thinphang thlalau in a ummi khi ka lo . Ka hna a ngam kho lo cun ka thuzir kho
hoi lo. Zei tal tuah ning ti hi ka lung ah a um peng. Thin thi zong in ka hngilh zir kho lo . Pakhat khat ṭihning
law mah ka ṭihmi nih cun thinphan thlalau in a ka um ter mi hna khi ka lo.
Sinain in ka nunnak kan van i zoh tik ah zeihmanh thinphan thlalau in um ding a
um ruam lo.
Zei si khawm ah tiah Bible ca rel le online i thawngṭha
an chim mi tal ngai tuah ning ka ti i naihrawng cu caan ka ngaih poh ah online
chung in an tlahmi thawngṭha bia ka ngai tawn. Tulio chan i kan rak nun hi
Pathian thluachuah hrim a rak si kho. Kha hlan chan lio ahcun Pathian thawngṭha
bia hi ngaih an um duh caan ah an rak
ngai kho ko. Biakinn i an i pumhcaan heiti bantuk lawng ah thawngṭhan bia hi
ngaih khawh a rak si . Nain kan nih cun khawika kan umnak hmun poh ah Pathian
thawngṭha kan ngai ko . Bible cauk zong rit langmang in kan kalnak kip ah i put
zong kan hau ti lo. Kan moble phone in zei poh kan i ken khawh dih cang .
Pathian thilser hi khuaruah haar lo awk a ṭha hrim lo. Cutin cun thawngṭha bia ngaih le bible ca rel in ka caan kan hman deoh . Khahlan i
thlacam ka daithlan mi zong nitin in thlacam hram ka thawk ṭhan. Pathian a ṭha
hringhran ko . Kan nunnak ah thinphan thlalau in kan ummi vial te cu a ka
lakpiak dih i nihin cun hnangam tein kan um cang.
Naikaar hrawng ka ngaihmi thawngṭha bia hna le ka reltawn mi Bible
cathiang hna nan sin ah tlawmte sharing tuah kan duh ve hna.
Bawi Jesuh a thawhṭhan tikah a zultu hna kha “ Ṭih
Hlah U!!! Vawilei dong tiang nan sin ah ka um lai.” Mah kha zawn BawiJesuh nih “ṭih
hlah U!” a kan timi hi kan ṭih peng ko maw?
“Ṭih hlah U!” timi bia hi kan Bawipa Jesuh Khrih
chuah hlan ahhin Vancung minih tuu khal hna sin ah “ṭih hlah u!! Khamhtu a ra
dawk kaw.” An rak ti cang hna.
“Ṭih” timi biafang hi Bible cathiang chung ah voi za
renglo in a hman .
Johan 16 : 33 ah hitin hin a ti. “ Nannih nih keimah
he nan i pehnak thawngin lungdiahnak nan hmuhnak hnga , hihi kan chim hna.
Vawilei nih hin haarnak an pek hna lai, sihmanhselaw ṭih hlah u ,
Vawilei cu ka tei cang” tiah an kan ti .
Salm 27: 1 -
“ Bawipa cu
ka ceunak le ka khamhnak a si ; a hohmanh ka ṭih hna lai lo. Bawipa cu a ka
hupphengtu ralhruang a si, ka thin a phang lai lo” .
Zohhmanh usih kan Bible thiang nih “ṭih hlah u !!” a
kan ti langmang mi cu zeidah si. Vawilei nih haarnak an pek ko lai a ti bang
khan vawlei cu haarnak hmun le ṭihphannak hmun a si. Kan ṭih i kan pah chih
ngam lo ahcun zeitik hmanh ah kan tei kho bal la lo . Cathiang ah hi tihin a ti
rih !
2 Timote 1 :7 –
“ Pathian nih a kan pekmi thlarau nih cun mi ralchia
ah a kan ser lo, ṭhawnnak le dawtnak le mah le mah i uk khawhnak tu khan a kan
khahter”.
“Ṭih hlah u!! Ṭih hlah u!!” a kan ti mihi Pathian
nih dawk khaw pennak pek a kan duh caah
a si . Kan Bawipa Jesuh nih khan a zultu hna kha a uah hna i “ Tuurun hmete hna
tih hlah u! Pa nih nan sinah a pennak pek an duh hna” ti ah a ti . Mah hi Bawi
Jesuh bia te a si. Thla kan cam tawnmi Jesuh Khrih nih a kan cawnpiak mithlacamnak
ahkhan “ Na pennak tlung cang ko seh. Vancung tuk in leicung ah na duhnak tlung
cang ko seh.
Mah si ah Pathian pennak timi cu zeidah a si kun?
Pathian pennak timi cu ṭihphannak le lungre theihnak
a um lonak hmun kha si . Hnangam tein kan um khawh kha Pathian pennak kan sin a
tlun cu si.
Carel tu nan dihlak cung ah Pathian nih thluachuah
in pe ko hna seh. Amen…Amen ….Amen
0 comments:
Post a Comment