Alibaba timi company min hi ka rak theihnak a saupah
cang.Internet chungah hin kan rak hmuhpah langmang ko nain ca i kan rak cawnmi
Alibaba le mifer sawmli tuanbia a si caah maw si hnga ka rak ruattuk huaha lo.
Cun Alibaba company cu Tiluk company a si caah ka lungah a umlo chinchin. Tiluk
thilchuah kawlram phanmi cu nan theihbang a rawkawl(a chia )tuk caah make in
china ti ummi cu cawk ding phun ah ka ratruat lo. Cu ruangah a sipah la kan
lungah a rak umbak lo . Si nain nikum september thlachungah US $25 billion tluk
share(IPO) han a zuarkhawh caah vawilei cung share a zuartambik a hung si timi
thawngpang le company ngeitu Jack Ma i a ngeihmi US $22 billion ruangah Tiluk
ramah a rumbik a hung si timi thawngpang cu internet chung le news ah ka
vanhmuh hnuin kan lung a hungchuak i a konglam theih ka van i zuam . Internet
chung, Youtube le Makazin chung ah kan van kawl i a kong lam cu ka van theih i
ka lung a tling ngaingai caah kan laimi mino hna nih i zoh chuntlak a si
ruangah theih ve hna seh law tiin zawnruahnak he sharing kan van tuahnak hi si.
Alibaba company timicu a
fawibik cun internet in thil a theihter( adertising) hna i a zuar thanmi
company pakhat si.Alibaga company kong kan chimah cun company a dirhtu
university saya Jack Ma kong chimlo ahcun a tlamtling kho la lo dah.Jack Ma hi Tiluk
nunphung lam( traditional dance) mi nupa hna chungin 1964 kum ah Hanzu khua ah
a chuak mi si. Sianginn a hungkai i a pum cu fate kaw a sianginn kai ti
hawinih an tihram , a dai langmang tawn. A pum a hmete nain Jack Ma hi ai
vuakrawh ah cun a mahnak milian pipi zong thihnak umlo bak in a lehtawn hna.
Jack Ma hi mirang ca thiam a duhtuk mi si. A khua ah hin mirangca
thiammi an rak um bel lo. Mirang ca cauk zong hi hmuhawk in a rak um lo .
Sianginn zongah mirang ca an rak cawng bel lo. A sinain mirang ca thiam a duh
tuk caah Jack Ma cu zeidah tuah tiah cun zing tuan tein a tho i sikal( cycle) a
cit i ramdang khualtlawngmi hna pawl an i dinhnak hotal pakhat khat ah
zingchiar a kal tawn . Ramdang minung pawl cu an khuachung kal an duhnak ah a
hruaitawn hna . Lamchimh man tangka a la bel hna lo . Lamchimh man ah mirang
holh ka chim uh a ti hna i tangka pe loin mirang ca tu an chimh tawn. A pum
hmete nain a vikvak a tha tuk ruang ah ramdang mi pawlzong nih a komh an duh
ngai .Caan tlawmpal hnu ah tangka a khawnmi in TV pakhat a cawk i
nichir TV chung a ra mi mirang holh khi a ngai zungzal . Ramddang pawlsin a kal
chel , TV chung a ra mi in a cawng chel , mirang ca hi a mah tein kum 9 bak
a cawng .Hi lio caan ahhin Tiluk rampumpi ah mirang holh a thiammi an rak
tlawmte . Conmunit uknak in a ukmi Tiluk rampi cu vawileipi he pehtleihnak an
ngei lonain nikhatkhat ahcun Tiluk rampi cu innka a ong tela i a cawnmi mirang
ca nih hin a nunnak caah tthathnemnak a ngei te lai ti a rak theih caah nichiar
a cawngpengnak hi si . Tangka chambau mi Jack Ma cu fimnak nih sifahnak chung
hin a ka chuah tertu a si lai ti a hngalh caah si.
Jack Ma hi mirang ca cu a
thiamngai konain Math(kanan) lei ah hin a thiam lo taktak mi si. University luh
khawhnak ding caminpuai(exam) a phi i Math(kanan) in a rak sung(fall). A
phithan nain a sung(fall) than.Biatak deoh in a hung i zuam i a vawithumnak ceo
ah a aung(pass). Sianginn ca a chim pah in University cu a kai pah i 1988 kum
ah university cu a hung dih. Sianginn a dih hnu in company 30 ah rian a sawk
nain company pakhat hmenh nih rian an pe lo . Arsa kio dawr (KFC) nih Tiluk ram
ah an hung dirh i cu ah cun minung 24 nih rian an sawk . Interview an tuahhna i
Jack Ma phakht telh loin minung 23 cu an aung(pass) . A dongnak ah Sianginn
pakhat ah mirang ca cachimtu rian, thlakhat ah US $ 12 (kawl tangka in 12000
hrawng) in rian ah cun a lut. Cachimh a thiam pinah mirang holh a thiam tuk
caah siahngakchia pawl nih an tleihchan tuk .
Jack Ma hngakchiat lio kong ka chim duhnak cu mirum,
milian ngan chung in a chuakmi a si lo i misifak chung in a chuak mi asi tihi
thei ve uh ti duhnak he ka chim mi si.A pum cu a hmete konain a chunmang cu
tlang bantuk in a lian taktak mi si.Sianginn saya a tuanpah buin caantha ,
caanrem a hngakpeng ko . 1990 kum hnu in Tiluk rampi cu vawilei pi nih innka
avan on ciamman i Tiluk rampi cu Business le Economic leiah a hung thangcho
thluahmah ko.Jack Ma zong sianginn cachimtu rianin a phuak ve in Tiluk ca kha
mirang ca in lehnak company pakhat a hung dirh ve.
1995 kum ah lam riantuannak project
pakhat ah cozah rian a bawm hna i a vawikhatnak bik US ram a rak phan.A hawile
nih computer on i internet chung ah duhmi thil poh cawkkhawh si an ti i Jack Ma
zong internet chungah BEER timi calung a rak tial ve . Beer cu a phunphun an
hung chuak nain Tiluk ram chuahmi beer pakhat hmenh a hmu lo . A khuaruah a
haar ngai ngai i tiluk ca in a tialthan nain zei hmeh a chuak hlei lo.Tiluk he
a pehtlaimi thil internet chungah zeihmeh a rak um lo. US in a rak tlung i
Tiluk ram ah internet thial zuarnak pakhat te a ummi China_pages timi website a
vun kam .An taarmi thil a tling lo pinah andihlak in Tiluk ca in a ni tial dih
caah Tiluk ca a thiam lo mi ramdang mi nih zeitindah an cawk khawh la ti a
lungah a hung chuak cawlh.
A caan
rem(opportunity)lio te si tiah a lungah a hung
chuak cawlh.Kum tampi a hngahmi Jack Ma hrang ah cun a caamrem(opportunity) cu tleihkhawh,
tuahkhawh dingin a tim lam cang.Kum 4 a rau hnu 1999 ah a hawile minung 17
rawlhrawng a kawhhna i a dirhdingmi company kong achimh hna . A dirhnak
ding caah tangka chiah a sawmhna. A hramthawk ah cun internet kong tlawmpal
telawng a theimi Jack Ma cu a zum pah lo. Asinain Lungtho taktak in le a
zuamtaktak mi a lungthin nih a hawi le cu an lung an hung tho ve. Company
dirhnak dingah $60000 a hung chuak. Website pakhat a ser. Computer kong atheih
tuklo nain Tiluk ca kha mirang ca in awlte in a theih caah a rianhma a kal ngai
ngai. Computer thiamdeoh mi ahawile kha a duhning in Website a serter hna.
Alibaba timi min in company pakhat a ven ser hnu caan a rau lo ramdang in thial
an van caah i a hei kuat hna. Tawlrel man Commission a lak hna.
Thla tamngai
a liam hnu ah US ram bank lianpi a si mi Goldman_Sach nih $ 5000000 le
Japan Company pakhat a si mi SoftBank nih $20000000 bak Alibaba in ah
anhung lut(Investment). 2005 kum ah Yahoo nih $ 1 billion bak a hung theh
(Investment) ve caah Investment balance $10 billion tiang a hung si. Alibaba hi
internet chung i thial a maik in a zuar tawnmi Amezo le eBoy hna he a dang
ngai. Thilcaw duhmi le thilzuar duhmi hna kha a pehtleihter hna i an rian
atlamtling ah cun Commission (riantuanman) a lak hna. Zeiruang ah
dah mahbantuk company te a si mi alibaba cu vawileipi theih tiangin a thangcho
khawh ti ah cun mandeng tein an chuahmi Tilukram chuak thial cawk aduh mi
nitlak ram lian pipi an ram um i Cu vebantuk in Tiluk miphung chung ah a hung
rumdeoh mi nih nitlakram chuak manfak mi thiltha hmanduh mi an ve caah si.Holh
a dangmi minung pahnih karlak ah um i a cawtu le zuartu an lungtling tiangin a
chimrel piak khawh hna ca zongah si.Jack Ma hi Business lei athiam le a
zuam caah a company a thangchonak a hrampi zong a si.Alibaba company hi a
tu ahcun $160 billion a phan cang.
Adongnak biak mino nih theih herh ngai mi , i cawn
awk tlak tak mi bia pakhat cu University kai lio i anrak i uar mi Jack
Ma nupi muidawh Zhang_Ying nih interview pakhat ah a chim mi
cu" Ma cu a mui a dawh lo nain muidawh mipawl an tuah khawh lo mi thiamnak
(အရည္အခ်င္း) a ngei. Mah cu thiamnak a ngeihmi cu ka thleih chan caah kan
vatnak hi si" ti ah a chim . A rat vat lio ah hin atu tlukrum ding a rak i
ruah lo nain Jack Ma i a thiamnak nih thanchonak tampi a um kho tiah a hmuh
caah si.
Alibaba
le Jack Ma chung ah theih herh mitete:
- Jack Ma hi atlung
pe 5 lawng a sang i ,kawl lemcang Beluoh he muizong a lo i an
pumrua zong a lo ngai mi an si.
- Alibaba cu
Alibaba_ Group kha a si i mahkha Group tangah Taobao , Tmail le
Alibaba timi company pathum a komhmi si.
- Alibaba timi mincu
vawilei cung theihmi tuanbia "Alibaba le mifir sawmli" mah cung
ta kha a lak mi si i, a laknak ruang cu vawilei pi nih theihmi company
siding in vawieipi nih theih mi tuanbia chung min a laknak si.
- Alibaba i company
website a rak zoh tuhi nikhat ah minung 100,000,000 hrawng an si peng.
- Jack Ma hi Howard
University ah kai a timh i vawihra bak asi nain a vawihra ning tein an rak
hnawn. Tu ah cun Howard University nih an rak kai terlo mi hi a ni chir
cang.
- Jack Ma i a min taktak hi
Ma Yun a si i a hngakchiat lio Hanzu khua a um lio ah mirang nu nih Jack
tiah a rak sak , mirang nu i anpa le chung hi Jack mipun an si.
- Jack hi Tiluk
kuat(သိုင္း) khi a huam ci te a si i nichir a cawngtawn.
- Riantuantu minung 15 in
rak dirhmi kha nihin cun minung thong 30 renglo an si cang.
- Alibaba hi customer nih
zumh hna seh tiduh ah lih a hmangmi ,zumhtlak asi lo mi company he rian a
tuan ti bel lo.
- Jack Ma zeitluk in dah mirang holh a
thiam ti theih na duh ah cun Jack_Ma_Davos_Interview timi in Youtube ah rak zoh teh.
0 comments:
Post a Comment