Korea Ram Ah A Cang Mi Thil

Media hi nikhat hnu nikhat in an thawng chin ko. Vawilei cung thil a cangmi poh cu a ruahhlan te ah  kan umnak hmun in kan theih, kan hmuh dih khawh cang. Zeitluk in lamhlat a simi zong minutes pakhat hlan ah theihdih le hmuhdih a si cang. Cutik ah khawika hmunpoh ah  a cangmi thil cu thuhnawh awk a tha ti lo. Kan vawlei pi zonghi khua hmete pakha he a khat ko cang.

Hlan deoh  i South Korea ram ah a cang mi  thil pakhat nih ka lung a ka lak taktak. Zeiruang bik ah ti ahcun kan mah Myanmar rammi pakhat nih a ton mi si i myanmar rammi si ko ahcun ruah lo awk a tha hrim lo. Cun kam khat lei ahcun thinlung zong a fak ko. Ralkap nih kan ram cu kum 60 leng an kan uk i ram le ram minung ca-ah riantuan lo in an mah tthatnak dingah rian an tuan ca-ah kan ram cu a rawk cikcek ko. Cu tikah kan ram cu miram dang he tahchunh ngam a si lo. Kan ram ah riantuan ding a tlawmtuk i rammi pi tampi cu riantuan awk kan ngei hna lo. Rian tuan awk umlo cang ahcun pawcawmnak zong a haar ngaingai ko. Cutik ah pawcawmnak ca-ah ti in ramkip le hmunkip ah kan vak vai cio hna. Laimi mitampi zong lairam chuak takin ramkip ah kan vak , kan vai hna.

Miphun dang ram ah kan um tikah kan tthutdir ning le kan umkal ning kan i ralring deoh a hau ko. Lai lei kan umning hna in cun um awk a tha ti lo. An ram ah kan umtik ah a zeidang kan va tuahpiak khawh lo hna hmanh ah an nunphung talcu kan upat piak hna awk a si .

Kan hnu lei deoh  ah tlanglawng i dinhnak hmun miza pi hmai ah kawl mi  pakhat cu an mah korea pakhat khat nih a thi zong chuak dih a vuak . A ruah hlan ah online chung ah an van thlak, a video in ka zoh ve hi cu ka thinglung a fak tak tak. An i vuaknak a ruang cu "Zei dah"(mawya -Korea holh ) a ti ruangbak ah mah tluk fah khan a vuak ko. Korea hi holh phunthum in an ngei. Mahnak upa a si loah mahnak rengsang sin chimmi holh, mah tthirual silole mah he a naihniam misin hmanmi holh le mahnak hngakchia silole mahnak reng niam sin hmanmi holh tiin phunthum in tthen a si.   Tutan kawlram mi pakhat a tawnmi hin "zeidah?" ti a hmanmi hi mahnak upa sin hmanding holh a si lo. Curuang ah faknak in vuak a tawnnak si.

Kan ram tthat lo ruang ah maw miram dang ah an tuanduh lo deohmi thadi zangbar in a kan tuanter . Cuchinchap ah a tubantuk thizong chuak dih in an vuak nain let lo tein a tuarmi ka hmuhtik ah kan calh hrim ve lo. Mah kha lio ahkhan keimah cu hei si sualning law zeidek ka lawh hnga tihi kei mah le kei mah bia kan hal langmang .  Laimi tam u cu mitang dor le mi va tihzah hi kan thiam lo ngai. A bi in kei mah hi ka si."Pasal" tihi a uarngai mi Laimi phun  kan si. A caan ahcun mah cu "pasal" kan timi hi a thatnak a um ko nain a caan ahcun a chiatnak zong a chuahpi ve tthiam. Zeitil poh hi an mah le an zawn te in hman ,chim le tuah ahcun a tha lo mi thil an um lo. Damnak ding i a sermi si zong khi a sining tein kan din lo ahcun thihnak tiang a chuak pi khawh .


Korea pa nih thizong chuakdih in a velh nain a let bak lo. An pumrua van zoh ahcun kawlram pa hmanh kha a lian deoh mi lo. Cun mino te a si i a thazang a tthawng lio te a si lai. Cutikah hei let seh lawng a teizong a tei ko la dah. Sinain kan ram a si lo, ka leh i ka tei zongah kei mah ka fak lai ti a fiang caah si lai dah. Korea ram cu kut i thlak chim rih hlah usih kan kaa in kan i pamh(pamhnak) hmanh hin dan i that khawh si. Kan kawlram pa a thiltuahmi nih kua tampi a ka ruahter i tampi a ka cawn piak.

Aa si le aa vua mi pahnih nak khan kan lung a ka la deoh mi pakhat a um. Mah cu velh atong mi a hawipa te pakhat kha si .  Mahhi  kong hi mizapi nih thei hna seh law, hmu ve hna seh tiah phone in video a thlak chih. A thlak pah in vuak a tongmi a hawipa cu  " Na kut i tal hlah " tiin a hei sik rih. Ceinawn in a vuak cangmu a ti vial khin a hawipa cu video camera lei rak zoh a ti rih i korea pa nih a khawndennak hma hna cu fiangte in record a lak khawh. Mah kha a thiltuah minih korea ramchuung lawngah vawlei pi sinah a phozaar ko. Korea new minthang hnanih an van thanh cawlh bak i a vuatu korea pa zong a thinphan i si lai police sin a mah tein a va ap ve. Cuti thil a caan khawhnak bik a hrampi cu a hawipa te tuahsernak thawng lawnglawng in a si ko.

Vuak an tonnak hmun ah kan mah laimi phun kan van i si ter tuah lai. Sualnak ngei lo in "Zei Dah? " ti ruangah tikhan vuak dingin hung khan dirawnh seh law kan mahnak in korea pa kha a fak deoh men la. Kan suallonak ah a kan ti cu teh tiphun in kan cheih hmasa la dah . Sinain mah kan tuahmi theipaar cu a thami theipar cu kan zuun lai ka zum lo. An mah ram si pin ah an mahmi kut kan thlak piak hna cu a thlatu kan mah lawng hmanh si loin kan miphun ning le kan ramning ning in tuarnak a ing ko mi kan si. Kan mah ruangah a sual lomi korea ram um kan hawile zong kan va hnirsuat dih khawh. Kan kam i record a kan lakpiaktu kan hawipa kha mah dih cun hawi zongah kan ruat ti la lo. Khatluk vuak le kutthlak ka tong cuahmah ko bu ah bomh cu chim lo na kutthla hlah na ti chap , Ka hawi ding ah ah na thlak lo tiah kan mawh chiat len la. Hawikom sinak zong in kan hlawt phah men ko lai dah.

 Mifim  nih cun mi an tuahsernak in cawnnak a ngah . Mihrut nih an mah tuahnak lawng in cawnnak a lak . Cunak in a hrut deohmi a molhmi nih cun an mah tuahsernak zong in cawnnak an i lak kho lo ti a si. Cucaah kan pawngkam thil a cangmi hin cawnnak kan i lak khawh zong i zuam ve hna sih. A bik in laimi cu khuaza rampi ah kan phan caah kan pawngkam umtuning a zoh kan thiam hrimhrim a herh ko. A tanglei ah an video cu ka rak thlak , hlan deoh a cangmi a si nain zeimaw ruangah upload ka rak tuah ko lo. Tuceo ah ka rak upload .
 Na rel caah ka lawm.

Share on Google Plus

About biathli

This is a short description in the author block about the author. You edit it by entering text in the "Biographical Info" field in the user admin panel.