Nihin cu phundang ngai in ka um. Ka kuasik, ka busik saisem a chuak. Rian ka tuan zongah ka rian tuanmi ka lungah umlo. Zeiruangahdah mahtin ka um hnga tiah ka khuaruah harpah ko. Nidangah mahtin hin ka um bal lo. Zawt hlah maw ka tim tihna ka ruat. Nai hrawng cu kan Company rian a tam ngaingai i tim le mang ah rian kan dih tawn caah mitkuh vuailo ka um a sau pah cang i mahruang ah si lai ti zumhnak ka ngei.
Zei si pohah nihin zaanlei cu tuandeoh in rian ka din la tiah saduh ka that. Chuncaw eipah khin kan boss sinah; " Nihin cu Over time ka tuan la lo " ka hung ti i ka bosspa cu a hmaichia nain ka hmai a ka khap pah lo simen la, " Si ko, tuante in i din kun law" a hung ka ti. Cun zaanlei cu kan hungtuan than ka taksa cu a fak bantuk ka khuasik bantuk in umbu in zaanlei suimilam 5:30 pm tiang cu ka hungtuan. kan dih cun ka hawi le hna cu an tuanrih ko . Nain kei cu inn leiah tin ka thawh.
Bus stop ah bus hngah pah in umhaar phen ah hla ka ngai la tiah ka phone cu ka van chuah i ariphone ka van i bunh. Hla van i thimzong ka huamti lo caah auto a play cawlh mi hla kha ka ngai. Ka ngaimi hla cu nidang i ngiah ka duh ka timi nakin ka lung a ka tong deoh. A hlabia nih a tha pin ah a satu zong a thiam . Bus cu riantin liopi si i minung kan tam , bus chungcu minung kan khat ko. A hnubik ah tthutnak a lawngmi ah ka hungtthu i khua ka cuan pah. Thingkung le pangpar hna nih muici tling in kua ram a dawhter. Ka ngaihmi hla nih Htoo Eain Thin sakmi Mother Home timi kha si kaw khua lei ka ngaihnak a zuarter chin.
Inn kan hungphan i lakmalak kholhnak leiah ka hung kal, kan hung i kholh cawlh. Mahcun ka taksa fah cu a hung damdeoh ngai. Cun ka zaw taktak sual lai tiah lufahsi tlangkhat le arti pumkhat kan van dolh hmasat cem. Cun computer on hram ka van thawk . Ka van kam luklak i ka off than. Nihin cu computer van zoh zong ka lungah a um lo.
Khawi lengtal ah van chuakning ka ti i ka angki leng ka van i hruk. ka inn kam dawrlei ah kal ka thawh Tuzaan cu ruah lo piin thlapi pum lilal in a rak mang ve. Kha hlan cu thlapi hmanh hi ka rak hmubal lo. Zoh awk zong ka rak thei lo. Zingtein rian ah ka kal i zaantim ah inn ka hung lawi tawnzong ahhin thlapi hi zoh awk hrim ka rak thei lo. Mah te lawngumnak hmun ahcun thlapi tiah dah lungler tuarpitu kan ngai lo i lunglen caan ahcun thlapi hi ka kawl hmasa cem theo.
Leng cu a kik caah innchung ah ka hung lut than. Nain a pumtuk mi thlapi zoh ka cimrih lo ca'h thlalangawng cungte ah thu in thlapi cu ka zohpah khin khurkhau tampi ka ruah pah. Khua lei kong ah ka hungthla, khua ah cun thlapa pum (Lah_pih) caan ahhin cun Tingt`eng he lam thluan zul in zai hla dawh kan rak saknak hrawnghrang hi ka mitthlam ah a um cuang. Ka ngeih hna a chiapah khin ka hung um.
Ka dawtpi hna hi dam in a um hnga maw ? Zei ko dah a tuah lio si hnga? ka lungah a hung cam ngai. Ka dawtpi ka timi cu kei mah nih ka uarmi, ka duhmi ngaknu dawh te khi a si. Kei ka mit ahcun kan vawileipi ummi nih a tlukmi an um lo. Mah cu fiangbak in ka chim khawh mi si. Nain fiangin ka chim khawh lomi cu a mahnih teh ka duh bantuk in a ka duh ve hna maw tihi si. Mah kha cu va um ko seh law. Cu loah cun a kongtam tuk ka tial ah cun a fiang tuk sual lai :p
Cutin cun lileng le umhaar in ka um nain thaizing riantuan tthan ding ka si caah thazang thar lathan dingin Pathian sinah lawmhnak ka chim hnu ah innak lei ahcun ka kal. Mah khua le mah innchung khar he umtluk hi a nuam mi a um. Miram dangah lunglen le thlavai kiangin kan um hna. Lungleng le thazang tharthawm i ka um lio caan ahin bia pakhat keimah le keimah ka halzungzal tawnmi a um. Zeiruang ah dah hika hin ka um timi hi si. Ka biahalnak ah ka leh pengmi cu Innchungkhar le keimah ka hmailei nunnak caah Pathian nih a ka phan termi si tihi a si zungzal.
An phai Korea ram, vanram a hluan an ti
Lenhoi rual nih phanh a duh cio
Ka phan ve maw Korea ram nuam
Nitin tuanzai ka rel , thlavai kingin
Sakhia a ka ti tawn, ramnuam um korea mi
Kuthruk le ka kut a tthan kho lo.
Pasal cuh in nihin tiang ka tuar
Ka phan telai Ka nu Ruuninn nuam ah
Ruahchan nak he , Pasal ka cuh
A phai Korea , pamhvalhnak ram ah...
Note: Sakhia ticu Korea holh a si i Pamhvalhnak ah an hmanmi biafang a si.
0 comments:
Post a Comment