Naihrawng
cu keimah velo bang kan manh lo ngai i ca ka tial khawh lonak zong a sau cang.
Cun nan sinah ka rak chuah lonak zong a sau cang caah tutan cu lenhloi pakhat
tial in nan sin ah ka rak chuak than . Catial hi a thiammi poh lawngnih tial uh
ti a si lo caah a ho poh nih ka tialmi hi ca a si ko. Bia le lampeh tiah, catial thiam a duhtuk mi
hngakchia pate nih a nu sinah catial thiam ka duhtuk ti ah a chim langmang.
Vawikhat cu a nunih khah ka fa catial thiam na duh ahcun A,B,C…..Y,Z na cawng
ne la tiah a fial lio ah a ca-uk chung ah “Catial thiam ka duh tuk” tiah a rak
tial manh cang ti si. Chimduhmi cu catial hi cu kan lungchung i kan ruatmi
pakhat te kha catlap chungah kan hungtial i mahcu kan tialmi tete a hungtam ,
cu a tampi mi cu kan hungpehtonh hna ahcun reltlak ca pakhat ah a a chuak ko . Cucaah
kan zapi in catial i tim ve hna uh sih tiah kan sawm hmasa hna.Awkhah tutan ka
tial ding hi a saupah lai caah biadang cun lutti loin ka ca tuah hung lut cawlh
ko ning law.
Ka
hngakchiat lio tehin mi sinah a chuaklang tuk mi ka si lo. Hawikom zong ka ngei
kho tuk lo. Innpa chakthlang dah ti lo cun ka komhmi an um tuk lo. Sianginn ka
rak kailio ah saya tenih ca an hal tawn ah mihmai va chuah i zoh lo in ca varel
zong khi ka ngamh tuk lo. Saya te nih ca an ka hal tawn ah rel ah cun ka thawh
peng ve nain a donghtiang ka chuah kho bal lo . Mihmai i an ka relter tikah ka
aw thir i a dongh hlan ah ka aw dih
peng. Cutikah ka thiam ko bu zong ah fungtuk ka huah zungzal. Sinain exam cu ka
awng ve langmang ko.
Tangli
cu ka hung pan , a ni khatnak bik sianginn cu nuam ngai in kan hung kai. Sianginn sautuk ka van khaar i a
nikhatnak bik kai cu a nuamngai ko. Zal thar le thil thar he kai si cu awh ;p. Kumdang he a lawh lonak pakhat cu kan class
ah ka hmuhbal lomi nu pakhat kan class ah a a rak kai ve i kan ruahnak ah mah
nute lawng a um cang. Chun nitlak a mah ka zohnak ah ka caan tampi a dih.Cu ni
cu nidang nakin a tawi khun mi lo. A mah cu mi hmete a si nain a vikvak , a
holhtam pinah mi chawnhbiak ziazong a thiam. Zaanlei sianginn chuah cun inn leiah ttin ka
thawh. Ka hmailei deoh ka van zoh i tuni ka hmuhmi nute kha ka kalnak ding lam
lei panh in a rak kal ciahmah ve ko. A thli tein a hnu in cun ka zulh i kan inn
ka phanh tiang ahhin kan innkaam ummi inn pakhat ah a pial ve. Yiah mahhi innpa
tepei kan rak si ko la hi tiah ka lungchung in ka ruat pah.Sinain, biafiang ka
theih rih lo caah lung awtawm in ka um. Hleihlak ka kaipah khin ka hei ngiat
pah rih. Inn chungah cun ka hung lut bak in ka nu aw ka hung theih cawlh. Rawl
a chuanpah khin “ Pate , Na rak ttin cang
maw?” a hung ka ti. “Aw! Ka rak tin
cang”. “ Khah ,sicun na zal kha i chiah
law , buhhang kan tuahpiak mi rak ding
ne” a hung ka ti. Ka zal cu ka chiah i ka nu tuahpiakmi buhhang ding cu ka thawh. Ka din pah khi “ Ka nu, Kan inn kam inn lawngmi ahkhan
midang maw an an um cang.?” Tiah ka hal cawlh. “aw, ka fa nizaan zaanlei ah teh a hung i tthialmi an um cu an pabik
kha nan sianginn ah sianginn cachimtu a si ve cu teh ” . “ A ho te dah an si, khawika inn dah an
rat?” tiin hngakchia biaduh ti bang kan vun pehcawlh. “Na thei hna lai lo. Laitlang in a hung pemmi an si”. “aw, takin tuchun ah ka hmuh ballomi pakhat
kan class ah a rak kai ve. Kan inn kam inn ummi ah khin a tin ve.” Tiah bia cu ka peh chap. “Aw,mah ka inn ah khin nang tthirual nute a
um ve. Mi pemthar a si caah hawikom a ngeih la lo. Nangmah nih va kom awh”
tiah a chim pah khin ka nu cu cardum lei ah a kal cawlh.
Buhhang
ka din dih cun paw khim paar in innleng ah ka hungchuak . Ka hawile cu mikham
an rak i kah len ko. “khah , kan tongh khah,” “ Na ka tong lo” ti in an rak i
al cuahmah len ko hna. An mikham khahnak lei ah cun ka vakal ve i ka vai i tal
ve. Mikham kan i kah cuahmah lio ahcun
kan kam teah mipakhat a dir ve khi ka hei hmuh. Ka van zoh deoh i tuni class
chungah ka hmuhmi nute cu a si ziar ko . Mahcun ka nu nih a ka chimhmi kha ka
lungah duk a hung chuak cawlh . Ka nu chim ban in mipem thar an si tikah hawikom zong a ngei
tak ve lo . Mikham kah cu ka sawm ve. Vantthat ah kan hawipa minung pakhat a
pakmi an rak um ve caah an pahnih cun kan lutter ve hna . A nih kha kan mah lei
ah a taang . A hramthawk ahcun nute kan ti cu a ningzah pah i si lai dah. A
cawlngam tuk lo , kan van i kah deohdeoh cun a van i biatak deohdeoh ve rua a mah thawng in ka tei langmaang hna. A pum
nih a hme piin ah a vikvak tuk i mikaar ah a tenh khawh langmang ko. Ka zoh
ahhin cepa tekhi a lo ko. Cu zaanlei cu ka caahcun nidang nakin kan mikham
kahmi hi a nuam deoh in ka thei.
Zaanlei
khawlh a hungcut hrawng cun kan nu le cio nih khawlh dingah an rak auh cio
cang. A nihzong an auh ve caah lawi ai tim cuahmah lio ahkhin “zeitin dah kan in auh la. Na min kan in
thei lo ee” tiah ka hei hal. “LyLy ka
si” tiah piangko in a ka leh pah cun an inn lei ah a tek viahmah ve. Mah cu
ni thawkcun Lyly cu ka rak duh. Hngakchia lung kan ti cu duhnak hi zeidah an si
ti zong ka thei lo. Duhnak hi a kha maw si a thum dah ti zong ka hngal lo.Sinain,
ka thinlung chung in a chuak mi si caah keimah caah lawmhnak in a khat ko. Cutikah
mahlio ka thinlung chung in a chuakmi duhnak kha a rak thianghlim bik ko lai ti
zumhnak ka ngei. Sinain LyLy sin duhnak bia phuan ding ka rak ngamh lo. LyLy ka duhnak cu lengchuak lo in ka
thinlung tuah ka fiim.
Cutincun
innpa le class khat kan si caah kan i pehtlaihnak hi a kau deohdeoh. LyLy te
unau hi unau pa thum an si. Nulawng te an si i a mah hi a hniang bik a si. Tta
a ngeih ve lo caah a tta bantuk in a ka zohthla , a ka bochan. Minih an tihram
pohah kei mahsin ah a rak ka chimh tawn. Keizong nih ka rak chanh i ka rak
dirpi langmang. Sianginn cahimtu fa ti
hrat cu ca a thiam , a kutttial zong a dawh. Kan class ahhin pakhatnak an chuah
mangmang. Zaan poh ah LyLy te inn a si loah kan inn ah ca kan zoh tawn. Lyly
tein kan zoh ahcun holh khawh a ngah lo. Apa nih an kan tthuthnawh i an kan
zohter mi kan thiam lawnglawng ah kan cazoh cu kan ngol tawn. LyLy cu a thluak
zong a rak tha pinah ca zong a zuam. Kei pakhat ka thiam hrawngah khin pahnih
hrawng cu a thiam cang. Ca zoh ka huam lo poh ah tuzaan cu kan inn ah ca kan zoh lai tiah class chung ah ka chimh tawn. Lyly nih cun ka
bia a al ngam ve lo i kan inn ah kan zoh caan zong a um. Kan inn i kan zoh
ahcun ca pakhat hmah kan thiam lo caan zong a um tawn.
Cutin
cun kumlecaan a hung liam langmang i tangsarih tiang kan hung phan . kum 15
hrawng kan hung si cang caah LyLy zong nungak lungte a hungthei ve cang. Tangsa
rih kan kai lio saya te upat peknak puai ah pangpaar lam in lamding ah kan
sayamah nih an rak kan fial. Lyly hi a aw zong a tha i hlasak zong a thiam caah
a nih hi hlasa tuding ah a rak si. Keitu cu lamtuding ah ka rak si.Lam cu zaan fatin in kan cawng tawn hna. Zaan
khat cu kei mah he lamtti mi nute a dam lo caah lyly he a lam tiding kan rak
si. Ka thin a rak tuur ngaingai. Mahni zaanlei cu thiangte in ka khawl i ka u
zihmui a thli tein ka kah ve. Lam cawn kan kalhlan ahhin ka hmaile thlalang hi
aa tthen lo ti awk a si. A ruang cu LyLy he lamti ding kan si caah si lai dah.
Mah cu zaan cu ka caah a sunglawi bik zaan a rak si ko. Ka duhmi he hmunkhat
teah kan rak lam ti ruangah a si ko lai dah.
Nikhat
cu LyLy sin in ka ruah lotuk mi biapakhat ka theih. “ Angkep , Hmaizarh cacawn
nikhat ni cun kapa nih an kan auh cang caah ramdang kan kal cang lai” tiah a
rak ka chimh.Ka min hi Hrang Kep ka si i ka hawile nih dawtnak in Angkep tiah
an ka auh.Mah cu lio caan cu Pathian um lonak vawilei ah maw ka um titiang ka
ruah.Ka mit a mui, umawk ka thiam lo pinah chimding ka thei lo. khuasik thla a hungdih i thaal a hungchuah ka
hrawng a si. Thal a hungchuah cun
thingkung hna nih an duh ti lomi thinghnah an hung tlak lio caan te a
si. Zaan lei thizil te nih kik hliahmah tein ka thinlung tiang an hung ka
chem.. Khua ka hoi ah meikhu nih tlangkip an cul . Leh awk ding bia zong ka
thinlung chung in a cuak kho ko. Cutin cun khua ka ruah cuahmah lio ah “
Angkep zei dah na ruah kan chawnh cu!” a van ka ti vial lau langmang in “ Aw! Yiah sianginn zong kan khar deng cang
tlung , exam tal na tuah ta la lo maw?”tiah ka leh. “ Aw, ka pa nih a kan kawh cang caah ka tuah mah ti la lo” tiah a ka
leh. Inn ah ka tin cun um awk kan thiam ti lo. Ka si a vang, ka lungre a thei.
Zaan zong ka hngailh kho ti lo. Lyly hi ka duhnak bia ka chim ta loahcun a caan
ka ngei ti lai lo. Cucaah ka chimh ta hrimhrim la a ka al pek al lo pek ah tiah
pasal cuh in ka lung ka thlek.Zeitin dah ka chim lai tiah cu zaan khuadei bak
in ka ruat. Sinain a phi ka chuah ko lo.A thaizing zaanlei cun LyLy te inn ah
thlahnak rawl dumtti nak an tuah. Rawl kan ei khim cun “ Lyly , kunya kan caw la” tiah ka sawm . Lyly cu rithainak a simi
cu zeihmah a tong lo nain ka bia al ngam
lo ah “aw, kal ko sih ca” tiah a ke
leh. LyLy nih hin zeitikhmah ah ka bia a
ka al bal lo. Ka chimpoh tuahpi khawh a
ka zuam. Kunya cawk ahcun Mawtaw saikal in khua lu lei ah kan kal. Kunya kan
cawk pah cun “LyLy chimhding te kan ngei, Khualuh lai tlangbo ah kan kal lai?”
tiah ka sawn.Kan khua luhlai thlangbo cu a thianghlim i mi aw aan zong a dai
caah nungak tlangval an kal tawnnak hmuh a si. Zaanthlai thlavang tangah ka
hawile he tingtteng tum i hla kan sak tawnnak hmun a si. Cun kua luhlai tlangbo
ahcun kan kal i kan thu. Zaanlei niliam lai te a si khaw cerlian ninu nih aa
dawhnak muici tling in thlanghram in kan pahnih biaruah mi ngaih awh ah a rak
kan hngah ko .Zeitin ah bia ka awl lai tizong ka thei kho lo. Sinain, mahtiang
hmanh a ka zulh cang ko i ka chimh lo
ahcun zeitik hmanh ah chimnak caan ttha ka ngei ti lai lo ti lalo cucaah ka
chimh hrimhrim lai . LyLy liangnem te
cung ah ka kut kan hung chuan pahkhin “LyLy
kan duhtuk?” tiah ka chim cawlh. Kan hngakchiat tein kan sining aa thei dih
mi kan si caah si lai dah LyLy zong nih “ Kan duh tuk veko” tiah ruat lo tein a
ka leh cawlh ve. Kan pahnih cun kan i kup .Lyly sin in thieh ka duh bikmi bia
ka hungtheih i ka lawm hringhran nain LyLy cu ka um lonak le ka thieh ballonak
ram ah hmaizarh cun a kal cang ding ti ka ruah cun lawmhnak pin ah
ngaihchiatnak nih a hun zulh cawlh ko.. LyLy zong a si ve lai dah a biangno cungte ah
mitthli a luang ruangmang khi ka hun hmuh . LyLy biangkino cung a thlami mithli
nih ka thinlung a kekkuar dih hlah maw ti awk in a um. Sinain, pasal cuh in
mitthli tlak cu ka suum ka ti cuahmah bu ah ka awtu nih cun a rak calh ve lo .
Ttah awnawn khin “LyLy
tap tihlah law , Ngamcang ko. Pathian kan
i bochan lai i Pathian nih tonthannak
caan cu an kan serpiak ko lai” tiah ka hneh pah bu cun a biangno cung tlami
mittthli cu ka hung hnawh piak. Ka kut siapi cung i a hnehmi LiLy mithli hi a
lum khun in ka thei. “Khah Lyly tincang
uh sih. Tuzaan nan inn ah pumhnak a um lai caah Na chungle nih an in hlam tuk
lai” ka vun ti. Lyly cu a holh zong a holh kho ti lo a lu te a hung suk i
inn lei ah kan tin.
Lyly
te chung cu an chung dihlak in a pa sinahcun a i thawh . Mahnak cun Lyly thawng
ka theih ti lonak hi nihin ni tiang a si cang nain Lyly hi Nikhat tezong ka
philh bal lo. Kan lennak cu thlang thong zong nih kan dang hmanh seh LyLy ka
duhnak le ka dawtnak cu zeihmanh nih a a dawn kho lai lo.Mithmuh kuttongh khawh
lonak hmu ah um hmah usih “Lyly” nang
mah caah zumhthlak in ka nung peng ko lai. Nang zong keimah caah zumhthlak tein
na nunnak rak hmang ko awh. Cung Pathian sin tu ah thlaza cam in ka hal zungzal
. Lawmh tuk caan, ngaihchiah tuk caan kan ton fatin ruah lo piin a luangmi ka
mithli ka hnawh zawnah ka kut siapi cung luang mitthli lum te nih zeitiang khi
dah na mithmai panh te a thaarchuah than rih lai . Kan ngaihnak hi Cungthlapi
le fidi sin ah ka ruah theo tawn .
A
duhmi caah hin thihttian maw a fak deoh hnga nunttian dah tiah ka hal hna seh
law kei nih cun nunttian ka ti ko lai. Thihttian cu kan vawlei pi ah an um ti
lo caah a caan a ruah cun caan nih a kal pi theo tawn. Nuntian tucu kan vawlei
pi ah kan mah bantuk in an um peng ve i zeitik ah dah tonthannak caan um te lai
ti ruahchannak kan ngei peng. Ruahchannak kan ngeih chungpouh cu a mah kan phil
kho lo ti nak a si. Kei zong LyLy hi ka
theih lonak hmun ah kei mahbantuk hin zuuntuar in a um ve sual la ti ka ruah ah
ka calhtawn lo. LyLy , kan pa hnih a kan tthentu Refugee hi kei cu ka rak doh
zungzal ko. Kan mah bang a duhmi ngaknu tlangval hna an a tthenthan hna ding cu
ka ruat kho lo. Kan mah bang an tuar lai
ka tihphan piak tuk hna.
Laimi
phun cu kawl ralkap uknak tangah kumcaan saupi kan um . Kan mah ram hmah ah
thinphang thlalau in kan um lio ah Pathian nih thlawchuah an kan pek i refugee
in ramthatnak ah a tingreng lo aa kan
phanhter cang . Refugee in kan miphun kan tunmer ko. Miram dang kan phanh tikah
an mah fimthiamnak kan cawng .Mi sining
kan hmu kho.Kan ruahnak zong a kan kau ter deoh hrim ko, Kan ti cuahmah lio ah
kei caah cun Pathian thlawchuah a simi Refugee hi ngeihchiatnak , zuuntuarnak le ka
thinlung kek kuaitertu a rak si . Mah tik ah Refugee hi ka doh lai tiah ka lung
ka rak in thlek cang. Refugee hi donghter dingahcun kan ram ah lunglawm tein le
hnangam tein kan tthutdir khawh a herh. Kan ram ah riantampi tuanawk ser a herh
, Miramdang bantuk in chawlehthelnak thanchoter a herh, kan Fim cawnnak a hrampi zong hawi kan tluk a herh
hringhran. A tlangpi in van chim ah cun kan ram hi ramthatnak bantukin a kaakip
in a tthan cho a herh hringhran ko. Kei mahbantuk in a tuarmi hna le kua a
ruatmi nan umah cun hmunkhat teah rian tuantti dingin kan sawm hna.
Biathli
0 comments:
Post a Comment